SGÔR: Ieithoedd Lleiafrifedig a Phêl-droed / Minoritised Languages and Football

Cost: Am ddim

Mae chwaraeon yn chwarae rhan bwysig mewn cymdeithas.

Mewn cymunedau lle mae ieithoedd lleiafrifedig yn cael eu siarad, mae pêl-droed – ar bob lefel – yn cynnig cyfleoedd unigryw, i blant a phobl o bob oed, i gynyddu ac ehangu eu defnydd o’r iaith, wrth fwynhau gêm y bêl gron.

O glybiau llawr gwlad i lwyddiant rhyngwladol Cymdeithas Bêl-droed Cymru, ar y terasau ac ar y cyfryngau cymdeithasol, mae gan y gêm gyfoes rôl arbennig i’w chwarae yn natblygiad y Gymraeg. Ac mae profiadau tebyg yn digwydd ar draws Ewrop.

Ers blynyddoedd, mae arwyddair Catalaneg FC Barcelona Més que un club yn teithio’r byd. Yn fwy diweddar, mae Basgeg yn iaith mentrau pêl-droed cymunedol ledled y wlad. Mae Llydaweg, Gwyddeleg Ffriseg, Sardinieg, a llu o ieithoedd eraill yn rhan o hunaniaeth bêl-droed cyfoes ar y maes chwarae.

Mae Symposiwm SGÔR yn gofyn: Beth yw’r sgôr ddiweddaraf ar gyfer pêl-droed ac ieithoedd lleiafrifedig? Ydy’r Gymraeg ar frig neu ar waelod y tabl? Beth yw’r tactegau gorau i glybiau, cymdeithasau a chefnogwyr er mwyn i’w hieithoedd lleifrifedig gyrraedd eu llawn botensial gyda’r bêl gron?

Cyfle i drafod a dadansoddi, gydag arbenigwyr o Gymru a thu hwnt.

Dydd Gwener 21 Mawrth. Canolfan yr Urdd. Bae Caerdydd.

Bydd y gynhadledd yn cynnig ysbrydoliaeth o ran sut y mae chwaraeon (yn benodol, pêl-droed) yn cyfrannu at hyfywedd a thwf ieithoedd lleiafrifol. Bydd y digwyddiad o ddiddordeb i unrhyw un sy’n cyfrannu at faes polisi iaith neu chwaraeon o unrhyw fath neu’n wir sy’n gweithio ym maes cyfathrebu a marchnata yn gyffredinol. Yn y gynhadledd, byddwn yn archwilio sut y mae pêl-droed – ar bob lefel – yn cynnig cyfleoedd unigryw, i blant a phobl o bob oed, i gynyddu ac ehangu eu defnydd o’r iaith, wrth fwynhau gêm y bêl gron.

*Bydd rhai siaradwyr yn cyfrannu yn Gymraeg ac eraill yn Saesneg. Bydd cyfieithu ar y pryd i’r Saesneg ar gael pan fydd y Gymraeg yn cael ei defnyddio. Bydd elfennau o’r gynhadledd yn cael eu recordio gan griw teledu.