Wedi ei bostio ar 22 Chwefror 2010
Steve Griffiths wrth ei waith yn Neuadd Gregynog
Yn ôl cyn reolwr ystâd Erddig, y plas sy’n eiddo i’r Ymddiriedolaeth Genedlaethol ger Wrecsam, yr hyn a’i denodd i’w swydd newydd yng nghanolbarth Cymru oedd y ‘waw ffactor’.
Steve Griffiths, 45, yw rheolwr ystâd newydd Neuadd Gregynog yn Nhregynon ger y Drenewydd, ac mae’n dal i fethu credu ei lwc ac yntau wedi’i benodi i’r swydd yn y ganolfan gynadledda a digwyddiadau hanesyddol a hardd.
Bydd yn gyfrifol am gynnal a chadw’r neuadd drawiadol ddu a gwyn ynghyd â’r ystad 750 o erwau, sy’n cynnwys 250 o erwau o goetiroedd.
“Doeddwn i ddim yn credu’r hyn oeddwn i’n ei weld wrth yrru i fyny’r dreif i gael cyfweliad yn Neuadd Gregynog,” meddai. “Fe ges i gymaint o syndod nes i mi droi’n ôl a gyrru i fyny eto. Dyma yw’r gyfrinach fwyaf yng Nghymru.
“Fe gerddais i o gwmpas yr ystad ddoe am y tro cyntaf, gan ebychu a dweud ‘Waw’ wrth droi pob cornel. Ar ôl 11 mlynedd yn Erddig, lle’r oeddwn i’n rheoli ystâd 1,200 erw, roeddwn i’n awyddus i gael her newydd ac rwyf i wedi bod yn lwcus iawn i gael swydd mewn lle mor brydferth.
“Rwy’n gobeithio y bydd ymwelwyr â Neuadd Gregynog yn profi’r un wefr ag y cefais i ac yn gwerthfawrogi’r gerddi, y coetiroedd a’r parciau ysblennydd.”
Mae pwyslais cryf ar ddatblygu gerddi a rheoli coetiroedd yn ei rôl yn Neuadd Gregynog wrth i’r lleoliad anelu at ei sefydlu ei hun yn gyrchfan bwysig i ymwelwyr.
Y tu allan i’w waith, mae Mr Griffiths hefyd yn adnabyddus ym myd ceffylau, ar ôl ennill y drydedd wobr yn y gystadleuaeth gyrru cerbyd genedlaethol ddwy flynedd yn ôl. Daw ei ddiddordeb mewn ceffylau gan ei dad, Fred, sy’n ffermio yn Isycoed, ger Wrecsam.
Disgrifiodd Karen Armstrong, rheolwr Neuadd Gregynog y penodiad fel un allweddol yn natblygiad y cynlluniau cyffrous ar gyfer y safle.
Mae Mr Griffiths yn ymuno ar gyfnod cyffrous yn esblygiad Neuadd Gregynog, sydd â chynllun i agor caffi yn y cwrt yn arddull Egon Ronay.
Mae Miss Armstrong hefyd yn ymgeisio am achrediad amgueddfa ar gyfer y safle ac mae’n awyddus i ymchwilio i’r potensial ar gyfer system wresogi coed gynaliadwy a chyflenwad trydan hydro o Lyn Gwgia gerllaw.
Ymysg y cynlluniau eraill mae codi ymwybyddiaeth amgylcheddol ar yr ystâd, lle mae Ysgol Coedwig eisoes wedi’i sefydlu a datblygu gardd furiog fel canolfan addysgu organig i bobl ifanc ag anawsterau dysgu.
Diwedd
I gael rhagor o wybodaeth i’r wasg, cysyllter naill ai â Karen Armstrong, rheolwr Neuadd Gregynog ar 01686 650224 neu Duncan Foulkes, ymgynghorydd cysylltiadau cyhoeddus ar 01686 650818.